రాజశేఖర్ రెడ్డి ఆత్మ ఘోషిస్తోంది..ఎమ్మెల్యే నల్లపరెడ్డి తీవ్ర ఆవేదన

దిశ, వెబ్ డెస్క్: కొద్ది‌రోజులుగా వైసీపీ ఎమ్మెల్యే ప్రస్టేషన్‌కు గురవుతున్నారు. తీవ్ర ఆవేదనకు గురవుతున్నారు. చిన్న చిన్న అంశాలకు సైతం రగిలిపోతున్నారు. ప్రతిపక్షాలకు శపనార్థాలు పెడుతున్నారు. ఇటీవల కాలంలో ఈ ఘటనలు మరింత ఎక్కువ అయ్యాయి. ఇందుకు కారణం వైఎస్ షర్మిల కాంగ్రెస్‌ పార్టీలో చేరడమే. ఆమె కాంగ్రెస్‌లో చేరినప్పటి నుంచి అన్న, సీఎం జగన్ మోహన్ రెడ్డిపై విమర్శల కురిపిస్తున్నారు. అంతేకాదు రోజుకో షాక్ ఇస్తున్నారు. వైసీపీలో అసంతృప్తిగా ఉన్న నేతలను కాంగ్రెస్ వైపు ఆకర్షిస్తున్నారు. దీంతో వైసీపీ నేతల్లో ప్రస్టేషన్ ఫీక్ స్టేజ్‌కి వెళ్లిపోయింది. షర్మిల మహిళ అని కూడా మర్చిపోయి తీవ్ర విమర్శలు చేస్తున్నారు. సమయం, సందర్భం లేకుండానే ఆమెపై విరుచుకుపడుతున్నారు. 

తాజాగా వైఎస్ షర్మిలపై కోవూరు ఎమ్మెల్యే నల్లపరెడ్డి ప్రసన్నకుమార్‌రెడ్డి ఫైర్ అయ్యారు. నెల్లూరు జిల్లా కొడవలూరు మండలం నార్తురాజుపాలెంలో బుధవారం వైఎస్సార్ ఆసరా కార్యకమాన్ని నిర్వహించారు. ఈ కార్యక్రమంలో పాల్గొన్న ప్రసన్న కుమార్ రెడ్డి సంచలన వ్యాఖ్యలు చేశారు. వైఎస్ షర్మిల కాంగ్రెస్‌లో చేరినందుకు వైఎస్ రాజశేఖర్ రెడ్డి ఆత్మ ఘోషిస్తుందని ఆవేదన వ్యక్తం చేశారు. కన్న తండ్రిపై కేసులు పెట్టి.. అన్న జగన్‌ను 16 నెలలు జైలులో వేసినా వైఎస్ షర్మిల కాంగ్రెస్ చేరడం సిగ్గుచేన్నారు. షర్మిల చేస్తున్న ద్రోహానికి స్వర్గంలో ఉన్న వైఎస్ రాజశేఖర్‌రెడ్డి కూడా కంటతడి పెట్టుకుంటారని ప్రసన్న కుమార్ రెడ్డి తీవ్ర ఆవేదన వ్యక్తం చేశారు. జగన్‌ను ఓడించేందుకే వైస్ షర్మిల కాంగ్రెస్‌ పార్టీలో చేరారని ఆరోపించారు. ఇందుకు భగవంతుడు ఆమెను క్షమించడన్నారు. వచ్చే ఎన్నికల్లో కాంగ్రెస్ పార్టీకి, షర్మిలకు డిపాజిట్లు దక్కవని ఎమ్మెల్యే నల్లపరెడ్డి ప్రసన్న కుమార్ రెడ్డి జోస్యం చెప్పారు.