ఏపీ అసెంబ్లీ ప్రొటెం స్పీకర్‌గా బుచ్చయ్య చౌదరి ప్రమాణం

దిశ, వెబ్ డెస్క్: ఏపీ అసెంబ్లీ ప్రొటెం స్పీకర్‌గా గోరంట్ల బుచ్చయ్య చౌదరి ప్రమాణ స్వీకారం చేశారు. రాజ్‌భవన్‌లో గవర్నర్ అబ్దుల్ నజీర్ సమక్షంలో ప్రొటెం స్పీకర్‌గా అధికారిక లాంఛన కార్యక్రమం పూర్తి చేశారు. శుక్రవారం నుంచి అసెంబ్లీ సమావేశాలు జరగనున్నాయి. దీంతో అసెంబ్లీలో ఎమ్మెల్యేలు ప్రమాణం స్వీకారం చేయనున్నారు. ఇందుకోసం ప్రొటెం స్పీకర్‌గా బుచ్చయ్య చౌదరి ప్రమాణ స్వీకారం చేశారు. శుక్రవారం జరగబోయే అసెంబ్లీ సమావేశాల్లో ఆయన సమక్షంలో 175 మంది ఎమ్మెల్యే ప్రమాణ స్వీకారం చేస్తారు. అనంతరం స్పీకర్‌ను ఎన్నుకోనున్నారు. ఇప్పటికే స్పీకర్‌గా సీనియర్ నేత, విశాఖ జిల్లా నర్సీపట్నం ఎమ్మెల్యే అయ్యన్న పాత్రుడిని పార్టీ సీనియర్ నేతలు ప్రతిపాదించారు. అటు అధిష్టానం సైతం అయ్యన్నపాత్రుడు వైపే మొగ్గు చూపినట్లు తెలుస్తోంది. డిప్యూటీ స్పీకర్ పదవిని జనసేనకు కేటాయించినట్లు సమాచారం. నెల్లిమర్ల జనసేన ఎమ్మెల్యే లోకం మాధవి పేరును పరిశీలించినట్లు తెలుస్తోంది.