కుప్పంకు సీఎం చంద్రబాబు.. రెండు రోజుల షెడ్యూల్ ఇదే..!

దిశ, వెబ్ డెస్క్: ఏపీ సీఎం చంద్రబాబు నాయుడు (Ap Cm Chandrababu) తన సొంత నియోజకవర్గంలో పర్యటించనున్నారు. ఈ నెల 6, 7వ తేదీల్లో కుప్పం(Kuppam)లో పలు కార్యక్రమాల్లో ఆయన పాల్గొననున్నారు. ఇందుకోసం అమరావతి(Amaravati) నుంచి బయల్దేరి సోమవారం మధ్యాహ్నం 12.00 గంటలకు కుప్పానికి చేరుకుంటారు. అనంతరం ద్రవిడ యూనివర్శిటీలో ఏర్పాటు చేసిన కార్యక్రమంలో పాల్గొంటారు. ఈ కార్యక్రమంలో స్వర్ణ కుప్పం విజన్ 2029 డాక్యుమెంట్‌(Swarna Kuppam Vision 2029 Document)ను చంద్రబాబు విడుదల చేయనున్నారు. కుప్పం మండలం, నడిమూరు గ్రామంలో గృహాలపై ఏర్పాటు చేసిన సోలార్ పలకల పైలట్ ప్రాజెక్టును సైతం ప్రారంభించనున్నారు. సాయంత్రం సీగలపల్లెలో 'ఆర్గానిక్ కుప్పం' కార్యక్రమంలో భాగంగా ప్రకృతి సేద్యం రైతులతో ముఖాముఖి నిర్వహించనున్నారు. 

అదే రోజు రాత్రికి ఆర్ అండ్ బి అతిథి గృహంలో బస చేయనున్నారు. 7వ తేదీ ఉదయం 10.00 గంటలకు కుప్పం టీడీపీ కార్యాలయానికి చేరుకుంటారు. నియోజకవర్గ నేతలు, కార్యకర్తలతో భేటీ అవుతారు. అదే రోజు మధ్యాహ్నం కంగునూడి గ్రామంలో శ్యామన్న విగ్రహాన్ని ఆవిష్కరించనున్నారు. సాయంత్రం నియోజకవర్గంలో పలు అభివృద్ధి కార్యక్రమాలకు శంకుస్థాపన చేస్తారు. రాత్రికి కుప్పం ఆర్ అండ్ బీ అతిథి గృహంలో బస చేయనున్నారు. 8వ తేదీ ఉదయం విశాఖపట్నం(Vishakapatnam) వెళ్లి ప్రధానమంత్రి నరేంద్ర మోదీ(Pm Modi)తో కలిసి అభివృద్ధి కార్యక్రమాల్లో పాల్గొననున్నారు. ఈ మేరకు అధికారులు ఇప్పటి నుంచే అన్ని ఏర్పాట్లు చేస్తున్నారు. అటు పోలీసులు సైతం అప్రమత్తమయ్యారు. సీఎం పర్యటనపై ఫుల్ నిఘా పెట్టారు.