వీరపనేని రామదాసు మహానీయుడు : ఎమ్మెల్యే సీతక్క

దిశ, ములుగు : నిజాం నిరంకుశ పాలనకు ఎదురొడ్డి నిలిచి, అత్యున్నత సేవా భావాలతో పీడిత, తాడిత ప్రజలకు అండగా నిలిచిన మహానీయుడు వీరపనేని రామదాసు అని ములుగు ఎమ్మెల్యే సీతక్క అన్నారు. గురువారం గోవిందరావుపేట మండల కేంద్రంలోని సీపీఎం పార్టీ ఆధ్వర్యంలో స్వాతంత్ర్య సమరయోధుడు, సీపీఎం పార్టీ సీనియర్ నాయకుడు వీరపనేని రామదాసు- వెంకటసుబ్బమ్మ విగ్రహావిష్కరణ కార్యక్రమం ఏర్పాటు చేశారు. ఈ కార్యక్రమానికి ముఖ్య అతిధిగా ఏఐసీసీ జాతీయ మహిళా ప్రధాన కార్యదర్శి ములుగు ఎమ్మెల్యే సీతక్క హాజరై వారి విగ్రహాలకు పూలతో నివాళులు అర్పించారు. ఈ సందర్భంగా సీతక్క మాట్లాడుతూ వీరపనేని రామదాసు నిత్యం పోరాటాలు చేస్తూ, నిజాం నిరంకుశ పాలనకు ఎదురొడ్డి నిలిచి, అత్యున్నత సేవా భావాలతో పీడిత, తాడిత ప్రజలకు అండగా నిలిచిన రామదాసు సంతాప సభను ఏర్పాటు చేసిన సీపీఎం పార్టీకి ధన్యవాదాలు తెలిపారు.

అలాగే రామదాసు త్యాగాలను ప్రజలకు తెలుపుతూ, ప్రజలకు చైతన్యాన్ని నిలుపుతున్న రామదాసు కుటుంబ సభ్యులకు కృతజ్ఞతలు తెలిపారు. రామదాసు ఆశయ సాధనలో మనమందరం కృషి చేయాలని, నీతి, నిజాయితీతో సాటి మనిషికి సహాయం చేయాలని, రామదాసు బాటలో పయనించి ప్రజా పోరాటాలు చేయాలని, అన్యాయం, అక్రమాలను నిలదీసి ప్రజా గొంతుకగా చైతన్యాన్ని అందరూ అందిపుచ్చుకుని పేదలకు అండగా నిలబడాలని అన్నారు. ఈ కార్యక్రమంలో కాంగ్రెస్ పార్టీ మండల వర్కింగ్ ప్రెసిడెంట్ రసపుత్ సీతారాంనాయక్, జెట్టి సోమయ్య, కొంపెళ్లి శ్రీనివాస్ రెడ్డి, సూదిరెడ్డి జనార్దన్ రెడ్డి, సర్పంచ్ లావుడియా లక్ష్మీ- జోగ నాయక్, గ్రామ అధ్యక్షుడు రామచంద్రపు వెంకటేశ్వర్లు (ఆర్వీ), తదితరులు పాల్గొన్నారు.