కోహ్లీ ఖాతాలో మరో రికార్డు.. ఏకైక భారత క్రికెటర్‌గా

దిశ, స్పోర్ట్స్ : రికార్డుల రారాజు విరాట్ కోహ్లీ ఖాతాలో మరో రికార్డు చేరింది. ఐపీఎల్‌-17లో భాగంగా బెంగళూరులోని ఎం.చిన్నస్వామి స్టేడియంలో మంగళవారం లక్నో, బెంగళూరు జట్ల మధ్య జరిగిన మ్యాచ్‌‌తో అతను అరుదైన ఘనత సాధించాడు. ఎం.చిన్నస్వామి స్టేడియంలో అతనికి ఇది 100వ టీ20 మ్యాచ్. దీంతో ఒకే వేదికపై 100 టీ20 మ్యాచ్‌లు ఆడిన ఏకైక భారత క్రికెటర్‌గా విరాట్ రికార్డుకెక్కాడు. వరల్డ్ క్రికెట్‌లో 15వ ప్లేయర్‌గా నిలిచాడు. 100 మ్యాచ్‌ల్లో భారత్ తరపున ఆరు మ్యాచ్‌లు ఆడగా.. ఐపీఎల్‌లో రాయల్ చాలెంజర్స్ బెంగళూరు జట్టుకు 85 మ్యాచ్‌ల్లో ప్రాతినిధ్యం వహించాడు. మొత్తం 100 మ్యాచ్‌ల్లో 39.73 సగటుతో 3,298 పరుగులు చేశాడు. అందులో 4 సెంచరీలు ఉండగా.. 25 హాఫ్ సెంచరీలు ఉన్నాయి. విరాట్ తర్వాత రోహిత్ శర్మ 80 మ్యాచ్‌లతో(వాంఖడే స్టేడియం, ముంబై), ఎం.ఎస్ ధోనీ 69 మ్యాచ్‌‌లతో(ఎం.ఏ చిదంబరం స్టేడియం, చెన్నయ్) తర్వాతి స్థానాల్లో ఉన్నారు.