కోల్‌కతా‌కు రెండో విజయం.. బెంగళూరు చిత్తు

దిశ, స్పోర్ట్స్ : ఐపీఎల్-17లో కోల్‌కతా నైట్‌రైడర్స్ వరుసగా రెండో విజయాన్ని నమోదు చేసింది. బెంగళూరు వేదికగా శుక్రవారం జరిగిన మ్యాచ్‌లో రాయల్ చాలెంజర్స్ బెంగళూరుపై 7 వికెట్ల తేడాతో గెలుపొందింది. టాస్ ఓడి ముందుగా బ్యాటింగ్ చేసిన బెంగళూరు జట్టు నిర్ణీత ఓవర్లలో 6 వికెట్లు కోల్పోయి 182 పరుగులు చేసింది. విరాట్ కోహ్లీ(83 నాటౌట్) కీలక ఇన్నింగ్స్‌తో చివరి వరకు అజేయంగా నిలిచాడు. గ్రీన్(33), మ్యాక్స్‌వెల్(28), కార్తిక్(20) విలువైన పరుగులు జోడించారు. అనంతరం 183 పరుగుల లక్ష్యాన్ని కోల్‌కతా 16.5 ఓవర్లలోనే ఛేదించింది. 3 వికెట్లు కోల్పోయి 186 పరుగులు చేసింది. వెంకటేశ్ అయ్యర్(50) హాఫ్ సెంచరీతో మెరిశాడు. సునీల్ నరైన్(47) తృటిలో అర్ధ శతకం చేజార్చుకోగా.. కెప్టెన్ శ్రేయస్ అయ్యర్(39 నాటౌట్), ఫిలిప్ సాల్ట్(30) సత్తాచాటారు. కోల్‌కతా బ్యాటర్లు చెలరేగడంతో బెంగళూరు చిత్తుగా ఓడింది.