ఢిల్లీ మ్యాచ్‌ను వీక్షించిన పంత్

దిశ, స్పోర్ట్స్: అరుణ్‌ జైట్లీ స్టేడియంలో జరిగిన గుజరాత్, ఢిల్లీ మ్యాచ్‌కు రిషబ్ పంత్ హాజరయ్యాడు. ఫిజియో‌తోపాటు పంత్ స్టేడియానికి వచ్చాడు. షార్ట్, వైట్ టీషర్ట్ వేసుకున్న పంత్ స్టిక్ సాయంతో మెల్లిగా నడుచుకుంటూ ఢిల్లీ క్యాపిటల్స్ డ్రెస్సింగ్ రూం వద్దకు చేరుకున్నాడు. అక్కడే కూర్చుని మ్యాచ్‌ను వీక్షించాడు. పంత్‌ను గమనించిన అభిమానులు.. మిస్ యూ పంత్.. ఆర్పీ 17 అని ఉన్న బ్యానర్లు, ప్లకార్డులు ప్రదర్శించారు. కాగా, గతేడాది రోడ్డు ప్రమాదంలో తీవ్ర గాయాలపాలైన పంత్ ప్రస్తుతం కోలుకుంటున్నాడు. ఈ నేపథ్యంలో ఐపీఎల్-16కు దూరమైన విషయం తెలిసిందే. అతని స్థానంలో ఢిల్లీ క్యాపిటల్స్ మేనేజ్‌మెంట్ వార్నర్‌కు బాధ్యతలు అప్పగించింది.