IPL 2024 : ఆ రెండు మ్యాచ్‌లను రీషెడ్యూల్ చేసిన బీసీసీఐ

దిశ, స్పోర్ట్స్ : ఐపీఎల్‌-17లో రెండు మ్యాచ్‌లను బీసీసీఐ మంగళవారం రీషెడ్యూల్ చేసింది. ఈ నెల 17న కోల్‌కతా వేదికగా జరగాల్సిన కోల్‌కతా నైట్ రైడర్స్-రాజస్థాన్ రాయల్స్ మ్యాచ్‌‌ ఒక్క రోజు ముందుకు ఈ నెల 16న నిర్వహించనుంది. దీంతో ఆ రోజున అహ్మదాబాద్‌లో జరిగే గుజరాత్ టైటాన్స్-ఢిల్లీ క్యాపిటల్స్ మ్యాచ్‌ను ఒక్క రోజు తర్వాత ఈ నెల 17వ తేదీకి మార్చింది. ఈ రెండు మ్యాచ్‌ల వేదికల్లో బోర్డు ఎలాంటి మార్పు చేయలేదు. కేవలం తేదీల్లో మాత్రమే మార్పులు చేసింది. ఈ నెల 17న శ్రీరామ నవమి ఉత్సవాలు ఘనంగా జరగనున్నాయి. అలాగే, లోక్‌సభ ఎన్నికలు కూడా ఉండటంతో కోల్‌కతా-రాజస్థాన్ మ్యాచ్‌కు క్రికెట్ అసోసియేషన్ ఆఫ్ బెంగాల్ భద్రతా విషయంలో హామీ ఇవ్వలేమని బీసీసీఐకి సమాచారం ఇచ్చినట్టు తెలుస్తోంది. ఈ నేపథ్యంలోనే ఆ మ్యాచ్‌ను ముందుకు జరిపిన బోర్డు.. గుజరాత్-ఢిల్లీ మ్యాచ్‌ను అహ్మదాబాద్ వేదికగా ఆ రోజున నిర్వహించనుంది.