పేద కళాకారులకు బిగ్ బి అండ

దిశ, వెబ్ బెస్క్: కరోనా వైరస్ వ్యాప్తి కార్మికుల జీవితాలను చిదిమేస్తోంది. ఆకలి కేకలతో అలమటించేలా చేస్తోంది. అలాంటి వారికి అండగా నిలుస్తున్నారు సినీ ప్రముఖులు. పేద కళాకారులను ఆదుకునేందుకు ముందుకొస్తున్నారు. మూడు పూటలా కడుపు నిండేలా చర్యలు తీసుకుంటున్నారు. ఈ క్రమంలోనే బిగ్ బి అమితాబ్ బచ్చన్ తన వంతు సహాయం అందించనున్నారు. ఇండియన్ ఫిల్మ్ ఫెడరేషన్‌లో సభ్యులుగా ఉన్న లక్ష మంది సినీ కార్మికులకు నెలవారి సరుకులు ఏర్పాటు చేయనున్నారు. ఈ విషయాన్ని సోనీ పిక్చర్స్ సంస్థ వెల్లడించింది. కరోనా విపత్కర పరిస్థితుల్లో ఒకరికొకరు సహాయంగా నిలవడం గొప్ప విషయమని… అమితాబ్ చేపడుతున్న కార్యక్రమంలో భాగస్వాములు కావడం సంతోషంగా ఉందని తెలిపింది. కళ్యాణ్ జువెల్లర్స్ సంస్థ సైతం బచ్చన్‌కు మద్ధతు తెలుపుతూ… ఈ కార్యక్రమంలో భాగస్వామిగా ఉంది. సోనీ పిక్చర్స్ నిర్మాణ సారథ్యంలో వస్తున్న ‘కౌన్ బనేగా కరోడ్ పతి’ కార్యక్రమానికి అమితాబ్ బచ్చన్ హోస్ట్ కాగా… కళ్యాణ్ జువెల్లర్స్ బ్రాండ్ అంబాసిడర్స్‌లో బిగ్ బి ఒకరు.