హేటర్స్‌కు బిగ్ బీ ఘాటు రిప్లై
బాలీవుడ్ సూపర్ స్టార్ బిగ్ బీ అమితాబ్ బచ్చన్‌కు ఇండియాలోనే కాదు ప్రపంచవ్యాప్తంగా అభిమానులు ఉన్నారనే విషయం తెలిసిందే. సోషల్ మీడియాలో తనకు దాదాపు 90 మిలియన్ల ఫాలోవర్స్ ఉన్నారు. ఇంతమంది అభిమానుల మనసు గెలుచుకున్న బిగ్ బీకి కరోనా పాజిటివ్ రావడంతో తను క్షేమంగా తిరిగి రావాలని ప్రార్థనలు చేశారు. జీవితంలో ఎన్నో వ్యాధులతో పోరాడి గెలిచిన బచ్చన్ సాబ్.. కరోనా మహమ్మారిని జయించి క్షేమంగా ఇంటికి చేరుతారని ధీమా వ్యక్తం చేశారు.
అయితే ఇంత అభిమాన సంపద ఉన్న బిగ్ బీకి కూడా హేటర్స్ ఉన్నారని ఇప్పుడే తెలిసింది. తను కరోనాతో మరణించాలని కామెంట్స్ చేశారు. దీంతో ఎప్పుడూ ప్రశాంతంగా తన పని తాను చూసుకుంటూ, ఇతరులను గౌరవించే బిగ్ బీ.. ఒక్కసారిగా ఫైర్ అయ్యారు. హేటర్స్‌కు వాళ్ల భాషలోనే సమాధానం చెప్పారు. ‘నువు నీ తండ్రి పేరు కూడా సరిగ్గా రాయలేవు, ఎందుకంటే ఎవరికి పుట్టావో నీకు తెలియదు!’ అంటూ ఘాటుగా సమాధానమిచ్చారు బిగ్ బీ.
జులై 11 నుంచి హాస్పిటల్‌లోనే ఉంటున్న అమితాబ్.. తన సమయాన్ని అభిమానులు, వైద్య సిబ్బందికి కృతజ్ఞతలు తెలుపుతూ పోస్ట్‌లు పెట్టడంలోనే గడిపారు. కానీ ఒక్కసారిగా ఇలాంటి తప్పుడు కామెంట్స్ పెట్టడంతో ఆగ్రహం వ్యక్తం చేశారు బిగ్ బీ.
