కాల్పుల ఘటన: జైల్లో నిందితుడు గోడకు తలను కొట్టుకొని..
దిశ, ఆదిలాబాద్: కాల్పుల ఘటన కేసులో ఆదిలాబాద్ జిల్లా జైలులో రిమాండ్ లో ఉన్న ఎం.ఐ.ఎం ఆదిలాబాద్ జిల్లా మాజీ అధ్యక్షులు, మున్సిపల్ మాజీ వైస్ చైర్మన్ ఫారూఖ్ హైమద్ ఆత్మహత్యాయత్నానికి పాల్పడ్డాడు. ఆదిలాబాద్ లోని తాటిగూడ కాలనీలో ప్రత్యర్థి వర్గమైన సయ్యద్ జమీర్ వర్గంపై గత డిసెంబర్ 12న ఫారూఖ్ కాల్పులు జరిపారు. ఈ ఘటనలో సయ్యద్ జమీర్ చికిత్స పొందుతూ హైదరాబాద్ లో మృతి చెందారు.
ఇక ఈ కేసులో జిల్లా జైలులో ఉన్న ఫారూఖ్ బుధవారం ఆత్మహత్యాయత్నంకు పాల్పడ్డాడు. వెంటనే జైలు సిబ్బంది అతనిని ఆదిలాబాద్ రిమ్స్ ఆస్పత్రికి తరలించారు. అయితే పరిస్థితి విషమంగా ఉండటంతో వైద్యుల సూచన మేరకు మెరుగైన వైద్య చికిత్స కోసం హైదరాబాద్ కు తరలించారు. ఇదిలావుండగా జిల్లా జైలు లో ఫారూఖ్ తన తలను గట్టిగా గోడకు కొట్టుకొంటున్నది గమనించిన తమ సిబ్బంది వెంటనే రిమ్స్ ఆస్పత్రికి తరలించినట్లు జిల్లా జైలు అధికారి సూర్య ప్రకాశ్ తెలిపారు.
