జూపార్క్ దగ్గర మర్డర్ కేసులో ఇద్దరు నిందితులు అరెస్ట్
దిశ, క్రైమ్‌బ్యూరో: బహదూర్‌పురా పోలీస్‌స్టేషన్ పరిధిలోని జూపార్క్ సమీపంలో ఈనెల 1న వ్యక్తిని హత్యచేసి, పోట్రోల్ పోసి దహనం చేసిన కేసును పోలీసులు ఛేదించారు. సీసీ ఫుటేజ్ ఆధారంగా నిందితులను గుర్తించి అరెస్ట్ చేశారు. మంగళవారం టాస్క్‌ఫోర్స్ అడిషనల్ డీసీపీ చక్రవర్తి గుమ్మి వివరాలు వెల్లడించారు. నగరంలోని కాలపత్తర్‌కు చెందిన వసీమ్, మిర్సిర్‌గంజ్‌ కుమ్మరివాడకు చెందిన మహ్మద్ ఆసిఫ్, కాలపత్తర్‌కు చెందిన సల్మాన్‌ఖాన్‌ ఈనెల 1న మద్యం సేవించిన అనంతరం జూపార్క్ సమీపానికి వెళ్లారు. మద్యం మత్తులో ఉన్న వీరి మధ్య వాగ్వాదం జరగడంతో వసీమ్‌ను… ఆసిఫ్, సల్మాన్‌ఖాన్‌లు రాయితో తలపై మోది చంపారు. అనంతరం ఆనవాళ్లు కనపడకుండా పెట్రోల్ పోసి నిప్పంటించి వెళ్లారు. తర్వాత స్థానికులు ఇచ్చిన ఫిర్యాదుతో ఘటనాస్థలికి వెళ్లి మృతదేహాన్ని పరిశీలించిన పోలీసులు కేసు నమోదు చేశారు. సీసీ ఫుటేజ్ ఆధారంగా దర్యాప్తు చేపట్టి నిందితులను అరెస్ట్ చేసినట్లు డీసీపీ తెలిపారు.
