Abhishek: ఒకే మ్యాచులో అభిషేక్ శర్మ రికార్డుల మోత

దిశ, వెబ్ డెస్క్: ఉప్పల్ వేదికగా శనివారం సాయంత్రం ఐపీఎల్ 2025 లో భాగంగా 27వ మ్యాచ్ జరిగింది. సన్ రైజర్స్ హైదరాబాద్, పంజాబ్ జట్ల మధ్య జరిగిన ఈ మ్యాచ్ ఐపీఎల్ చరిత్రలో భారీ రికార్డులను నమోదు చేసింది. ముఖ్యంగా ఉప్పల్‌ స్టేడియంలో జరిగిన IPL 2025 మ్యాచ్‌లో సన్‌రైజర్స్ హైదరాబాద్ ఓపెనర్ అభిషేక్ శర్మ పంజాబ్ కింగ్స్‌పై విధ్వంసకర బ్యాటింగ్‌తో పలు రికార్డులను బద్దలు కొట్టి, కొత్త రికార్డులను సృష్టించాడు. ఈ మ్యాచ్‌లో అభిషేక్ సాధించిన పలు రికార్డులు ఈ కింద విధంగా ఉన్నాయి.

అభిషేక్ శర్మ సాధించిన రికార్డులు

తొలి IPL సెంచరీ: అభిషేక్ శర్మ 40 బంతుల్లో 100 పరుగులు చేసి తన తొలి IPL సెంచరీ నమోదు చేశాడు. ఈ ఇన్నింగ్స్‌లో 11 ఫోర్లు, 6 సిక్సర్లు ఉన్నాయి. ఈ సీజన్‌లో ఇషాన్ కిషన్, ప్రియాన్ష్ ఆర్య తర్వాత సెంచరీ సాధించిన మూడో క్రికెటర్‌గా నిలిచాడు.

అత్యధిక వ్యక్తిగత స్కోరు: 55 బంతుల్లో 141 పరుగులు (14 ఫోర్లు, 10 సిక్సర్లు) చేసి, IPL చరిత్రలో భారత బ్యాటర్‌గా అత్యధిక వ్యక్తిగత స్కోరు సాధించిన రికార్డు నెలకొల్పాడు.

వేగవంతమైన హాఫ్ సెంచరీ: కేవలం 19 బంతుల్లో హాఫ్ సెంచరీ పూర్తి చేశాడు. ఇందులో 7 ఫోర్లు, 3 సిక్సర్లు ఉన్నాయి. ఇది ఈ మ్యాచ్‌లో అతని దూకుడైన ఆటతీరును స్పష్టం చేసింది.

పవర్‌ప్లేలో రికార్డు: అభిషేక్ శర్మ, ట్రావిస్ హెడ్‌లతో కలిసి పవర్‌ప్లేలో 120 పరుగులు చేసి, IPL 2025 సీజన్‌లో ఓపెనర్లుగా రికార్డు సృష్టించారు.

తొలి వికెట్ భాగస్వామ్యం: ట్రావిస్ హెడ్ (66)తో కలిసి తొలి వికెట్‌కు 171 పరుగుల భాగస్వామ్యం నెలకొల్పాడు. ఇది ఈ మ్యాచ్‌లో SRH ఆధిపత్యానికి బలమైన పునాది వేసింది.

కాగా ఈ మ్యాచులో సన్ రైజర్ జట్టు 246 పరుగుల లక్ష్యాన్ని మరో 9 బంతులు మిగిలి ఉండగానే విజయం సాధించింది. దీంతో ప్లే ఆఫ్ ఆశలను సజీవం చేసుకోవడంతో పాటు, జట్టును తిరిగి ఫామ్ లోకి తీసుకొచ్చారు. ఈ విజయంతో సన్ రైజర్స్ అభిమానుల్లో మరోసారి ౩౦౦ స్కోరుపై ఆశలు పెరిగాయి.