RMP డాక్టర్‌కు షాకిచ్చిన దొంగలు.. 35తులాల బంగారంతో పాటు..!
దిశ ప్రతినిధి, నిజామాబాద్ : నిజామాబాద్ నగర శివారులో గల ఆటోనగర్ సీఎం రోడ్డులోని ఓ ఇంట్లో భారీ చోరి జరిగింది. ఈశ్వాక్ అనే ఆర్ఎంపీ వైద్యుడు తన బంధువులు చనిపోవడంతో బుధవారం ఇంటికి తాళం వేసి బోధన్ వెళ్లారు. గుర్తు తెలియని వ్యక్తులు ఇంటి వెనుక భాగం నుంచి లోనికి ప్రవేశించి కిటికి గ్రిల్స్ తొలగించారు. అనంతరం ఇంట్లోకి వెళ్లి బీరువా తాళాలను ధ్వంసం చేసి చోరికి పాల్పడ్డారు. బీరువాలో ఉన్న 35 తులాల బంగారం, నగలు, రూ.3 లక్షల నగదును ఎత్తుకెళ్లారు.
శుక్రవారం తిరిగి వచ్చిన ఈశ్వాక్ కుటుంబ సభ్యులు ఇంటి ముందు ప్రధాన గేటు తాళం వేసింది వేసినట్టే ఉండగా లోపల ప్రధాన ద్వారం తాళాలు పగులగొట్టి దొంగలు లోనికి ప్రవేశించారని గుర్తించి పోలీసులకు సమాచారం ఇచ్చారు. ఇంట్లో నుంచి భారీగా సొత్తు చోరికి గురైనట్లు ఫిర్యాదు చేశారు. పోలీసులు ఇంటి ఆవరణలో ఉన్న సీసీ కెమెరాలను పరిశీలించగా.. అందులో ఒక వ్యక్తి అర్ధరాత్రి వేళ ఇంట్లోకి ప్రవేశించి తాళాలు పగులగొట్టిన దృశ్యాలు రికార్డు అయ్యాయి. దొంగతనానికి పాల్పడిన వారికోసం పోలీసులు గాలిస్తున్నట్టు తెలిపారు.
