మృత్యువు ఎదురొచ్చి.. ముగ్గురిని తీసుకెళ్లింది

దిశ, వెబ్ డెస్క్: కూలీ కోసమని ఇంటి నుంచి అంతా బయలుదేరారు. మధ్యలో మృత్యువు ఎదురొచ్చింది. అందులో ముగ్గురిని తన వెంట తీసుకెళ్లింది. మిగతావారిని కూడా తీసుకెళ్లేందుకు ప్రయత్నించింది. కానీ, వారు మృత్యువు నుంచి తప్పించుకోగలిగారు. ఇలా మొత్తంగా ఆ కూలీల ప్రయాణం విషాదంగా మారింది.

ఆ వివరాల్లోకి వెళితే.. జార్ఖండ్ కు చెందిన పలువురు కూలీలు బొలెరో వాహనంలో విశాఖలో కూలీ పనుల కోసం ఇంటి నుంచి బయలుదేరారు. ఇలా వస్తున్న క్రమంలో శ్రీకాకుళం జిల్లాలో నెమలి నారాయణపురం వద్ద ఆ బొలెరే వాహనం రోడ్డు ప్రమాదానికి గురైంది. ఆగి ఉన్న లారీని ఢీకొట్టింది. దీంతో బొలెరేలో ఉన్న కూలీల్లో ముగ్గురు అక్కడికక్కడే మృతిచెందారు. మరో 9 మందికి తీవ్ర గాయాలయ్యాయి. విషయం తెలుసుకున్న పోలీసులు అక్కడి చేరుకుని క్షతగాత్రులను ఆస్పత్రికి తరలించారు. అనంతరం కేసు నమోదు చేసుకుని మృతదేహాలను మార్చురీకి తరలించారు.